Mic 1 | NdeIBE | STEP | Ilizwi likaJehova elafika kuMikha waseMoreshethi ezinsukwini zemibuso kaJothamu, loka-Ahazi loHezekhiya, amakhosi akoJuda – umbono awubonayo mayelana leSamariya leJerusalema.

Micah 1

1 Ilizwi likaJehova elafika kuMikha waseMoreshethi ezinsukwini zemibuso kaJothamu, loka-Ahazi loHezekhiya, amakhosi akoJuda – umbono awubonayo mayelana leSamariya leJerusalema.

2 Zwanini lonke lina bantu, lalelani, hawu wena mhlaba labo bonke abakuwo, ukuze uJehova Wobukhosi afakaze ngawe ekulahla, uJehova esethempelini lakhe elingcwele.

Ukwehlulelwa KweSamariya LeJerusalema

3 Khangelani! UJehova uyeza evela lapho ahlala khona; wehlela phansi njalo enyathela ezindaweni eziphakemeyo zomhlaba.

4 Izintaba ziyancibilika ngaphansi kwakhe, lezigodi ziyaqhekezeka phakathi njengengcino phansi komlilo, lanjengamanzi esehla ngamandla emthezukweni.

5 Konke lokhu kungenxa yokona kukaJakhobe, ngenxa yezono zendlu ka-Israyeli. Kuyini ukona kukaJakhobe na? AkusiSamariya na? Iyini indawo kaJuda ephakemeyo na? AkusiJerusalema na?

6 “Ngakho iSamariya ngizayenza ibe yinqumbi yemfucuza, indawo yokuhlanyela izivini. Amatshe ayo ngizawathela esigodini ngiphendle lezisekelo zayo.

7 Zonke izithombe zayo zizaphohlozwa; zonke izipho zayo zasethempelini zizatshiswa ngomlilo; ngizaphahlaza zonke izifanekiso zayo. Njengoba yaqoqa izipho zayo eholweni lamawule, zizasetshenziswa njengeholo lamawule futhi.”

Ukukhala Lokulila

8 Ngenxa yalokhu ngizakhala ngilile; ngizahamba ngezinyawo phansi njalo nginqunu. Ngizahlaba umkhulungwane njengekhanka, ngikhale njengesikhova.

9 Ngoba inxeba layo kalelapheki; selifikile koJuda. Selifike kulo kanye isango labantu bami, kanye laseJerusalema uqobo.

10 Lingakukhulumi eGathi; lingakhali lakancane. Giqikani ethulini eBhethi Ofira.

11 Dlulani linqunu njalo lilenhloni lina elihlala eShafiri. Labo abahlala eZawanani kabayikuphuma. IBhethi Ezeli iphakathi kokulila; ukuvikelwa kwayo kususiwe kini.

12 Labo abahlala eMarothi bayazijanqa ngobuhlungu, belindele usizo ngoba umonakalo uvele kuJehova, wafika lasesangweni leJerusalema.

13 Lina elihlala eLakhishi, bophelani amabhiza enqoleni. Yini elaba yisisusa sesono eNdodakazini yeZiyoni, ngoba ukona kuka-Israyeli kwafunyanwa kini.

14 Ngakho-ke lizanika iMoreshethi Gathi izipho zokwehlukana. Idolobho lase-Akizibi lizabonakalisa inkohliso emakhosini ako-Israyeli.

15 Ngizalilethela umnqobi lina elihlala eMaresha. Lowo olodumo luka-Israyeli uzakuza e-Adulami.

16 Phucani amakhanda enu likhalela abantwabenu elibathandayo; ziphuceni libe njengelinqe ngoba bazasuka kini baye ekuthunjweni.